عندي مشكلة قديمة وتفاقمت من كانون التاني ٢٠٢٤ بقراءة كلمة "علمانيين" بالكتابات السورية، المشكلة إني بعرف الناس المقصودين بهل كلمة وبعرف تماما انهم مو علمانيين.
ما بدي ضيع وقت بتعريف كلمة علماني، يلي هي بتختلف عن كلمة لا ديني. والناس المقصودين بهل كلمة يمكن يكون لا دينيين بحيث انهم (بعضهم) لا يعرفون نفسهم بأنهم مسلمين أو منتمين لدين تاني.
يلي مقصودين بل علمانيين، أنا بفضل عرفهم بكلمة تقدميين.
الله يرحمك يا ابي كنت تعرف البنت الغير محجبة اللابسة لبس غلبت سماته الطابع الأوروبي على الشرقي بنت سبور ... ما اختلفنا ...
وفي ظاهرة ببلادنا الشرقية أو الإسلامية بترجع لبدايات القرن العشرين وهي ظاهرة ردة فعل، التقدميين مضادين للإسلام، بيحاربوا الظواهر الإسلامية على شخصهم أولا وبيحاربوا الظواهر الإسلامية بالفضاء العام ثانيا.
قبلة التقدم والتطور موجودة بالبلاد الغربية، وهاد من القرن السابع عشر، وما في غير مجنون فيه ينكر هل شي. هل ثقافة الغربية وقت مجتمعنا إختلط معها (بفترة الإستعمار) كانت نابذة الدين المسيحي (الكاثوليكي والبروتستانتي ) وخالصة تحول دولاتها لدولات مدنية.
وبمجتمعنا يلي أغلبه مسلمين هل محاربة للظواهر الأسلامية بالفضاء العام لاقت تقارب طبيعي مع المجموعات الدينية الثانية يلي بعضها من ركائزه هو إخفاء الظواهر الدينية بالفضاء العام أصلا ، أو ولأنها بتراجع كبير فخايفة تنمحي كليا إذا أخد الإسلام كل الفضاء العام.
ولهيك فيه تقارب بين التقدميين مع الجماعة الدينية الغير مسلمة.
الغلط برأيي لكتير من يلي منقراه بخطابات هل تقدميين هو انهم بحطو هل تخلص من الظواهر الإسلامية كهدف ووسيلة، مع إنه هو فقط نتيجة للتقدم، وهل نتيجة مو ضرورية حتى، ما حدا أثبت إنه التقدمية متنافية مع وجود الدين والأمثلة المعاكسة كثيرة بالعالم.
بس يلي هو أكيد إنه التوتر الكبير الموجود بالمجتمع السوري نابع من الفكرة بأنه التقدميين المضادين للدين الإسلامي عندهم إعتقاد إيماني انهم المستأثرين الوحيدين للتقدمية.
يعني لا بد أن تكون النتيجة رجعية في سورية إذا ما كانت القيادة لهم أو إذا عل أقل ما تم استشارتهم بكل القرارات.
يلي هو إيمان خاطئ وكل يوم بمر من بداية بناء الدولة بسورية بعد سقوط النظام على اسس قانونية وإحترام لأغلب المعايير الدولية الحديثة من قبل ناس ما بتحارب الظواهر الإسلامية وبالعكس بتتبناها كليا هو دليل على هل شيء.
شرح مفردات
تقدمي progressive
علماني atheist
مدني secular
رجعي reactionary